Isa 19 | NdeIBE | STEP | Isiqalekiso esimayelana leGibhithe sithi: Khangela uJehova ukhwele phezu kweyezi elilesiqubu esiza eGibhithe. Izithombe zaseGibhithe ziyathuthumela phambi kwakhe, njalo izinhliziyo zamaGibhithe ziba buthakathaka ngaphakathi kwawo.

Isaiah 19

Isiphrofetho ngeGibhithe

1 Isiqalekiso esimayelana leGibhithe sithi: Khangela uJehova ukhwele phezu kweyezi elilesiqubu esiza eGibhithe. Izithombe zaseGibhithe ziyathuthumela phambi kwakhe, njalo izinhliziyo zamaGibhithe ziba buthakathaka ngaphakathi kwawo.

2 “Ngizadunga umGibhithe alwe lomGibhithe – umuntu uzakulwa lomfowabo, umakhelwane alwe lomakhelwane, idolobho lilwe ledolobho, umbuso ulwe lombuso.

3 AbaseGibhithe bazaphelelwa lithemba njalo ngizakwenza amacebo abo abe yize. Bazabuza izithombe lemimoya yabafayo, amadlozi lezanuse.

4 AbaseGibhithe ngizabanikela enkosini elesihluku, inkosi eyesabekayo izababusa,” kutsho uJehova, uJehova uSomandla.

5 Amanzi omfula azakutsha, umfula uzachitsha, wome.

6 Imigelo izanuka, izifula zaseGibhithe zizakwetsha zitshe. Imihlanga lebhuma kuzabuna,

7 kanjalo lezihlahlanyana emakhunjini kaNayili lapho umfula othela khona. Konke okuhlanyelwe eduzane loNayili Kuzakoma, kuphephukele khatshana Kungabi khona.

8 Abagoli benhlanzi bazabubula balile, bonke abaphosa amawuka kuNayili, loba abajika amambule emanzini bazaphela amandla.

9 Labo abasebenzisa inxoza bazadangala, abeluka ilineni elihle bazaphelelwa lithemba.

10 Izisebenzi zasemalenjini zizadana, njalo bonke abahola imiholo bazakuba lusizi.

11 Izikhulu zaseZowani azisilutho kodwa izithutha nje; abaluleki bakaFaro abahlakaniphileyo banika izeluleko ezingelangqondo. Ungatsho kanjani kuFaro uthi, “Mina ngingomunye wamadoda ahlakaniphileyo, umfundi wamakhosi endulo?”

12 Khathesi bangaphi abantu bakini abahlakaniphileyo? Kabalitshengise balazise ngalokhu uJehova uSomandla asecebe ukukwenza emelana leGibhithe.

13 Izikhulu zaseZowani sezibe yizithutha, abakhokheli baseMemfisi bakhohlisiwe, abazinsika zabantu bakhona sebedukise iGibhithe.

14 UJehova usethele umoya wesiyezi phakathi kwabo; benza iGibhithe ibhadazele kukho konke ekwenzayo njengesidakwa sidiyazela emahlanzweni aso.

15 Akulalutho iGibhithe engalwenza – ikhanda loba umsila, ugatsha lwelala loba umhlanga.

16 Ngalolosuku abaseGibhithe bazafana labesifazana. Bazathuthumela ngokwesaba isandla esiphakanyisiweyo uJehova uSomandla abaphakamisele sona. 17 Lelizwe lakoJuda lizaletha ukwesaba kwabaseGibhithe. Bonke okuzakhulunywa kubo ngoJuda bazathuthumela, ngenxa yalokho uJehova uSomandla aceba ukukwenza kubo.

18 Ngalolosuku amadolobho amahlanu aseGibhithe azakhuluma ulimi lwase-Khenani, afungele ukwethembeka kuJehova uSomandla. Elinye lawo lizathiwa liDolobho leNcithakalo.

19 Ngalolosuku kuzakuba le-alithare likaJehova phakathi kwelizwe laseGibhithe, lelitshe lesikhumbuzo sikaJehova emngceleni walo.

20 Lizakuba yisibonakaliso lobufakazi kuJehova uSomandla elizweni laseGibhithe. Lapho bekhalaza kuJehova ngenxa yabacindezeli babo, uzabathumela umsindisi lomvikeli, abahlenge.

21 Kanjalo uJehova uzakwenza ukuba azakale kwabaseGibhithe, njalo ngalolosuku bazamvuma uJehova. Bazakhonza ngemihlatshelo langeminikelo yamabele; bazakwenza izifungo kuJehova bazigcine.

22 UJehova uzatshaya iGibhithe ngesifo; uzabatshaya aphinde abasilise. Bazaphendukela kuJehova, njalo uzakuzwa imikhuleko yabo abasilise.

23 Ngalolosuku bazakuba lomgwaqo osuka eGibhithe usiya e-Asiriya. Abase-Asiriya bazakuya eGibhithe, abeGibhithe labo baye e-Asiriya. AbaseGibhithe labase-Asiriya bazakhonza ndawonye. 24 Ngalolosuku i-Israyeli izakuba ngeyesithathu kanye leGibhithe le-Asiriya kube yisibusiso emhlabeni.

25 UJehova uSomandla uzababusisa esithi, “Kayibusiswe iGibhithe abantu bami, i-Asiriya umsebenzi wezandla zami le-Israyeli ilifa lami.”